Beste graanboer kom van Wes-Kaap

'n Boer van die Wes-Kaap, mnr. Willem de Waal (66), het stof in ander boere se oë geskop toe hy op Bothaville as Graan Suid-Afrika se Graanprodusent van die Jaar aangewys is.

Op pad wenpaal toe het hy twee ander finaliste, mnre. Koos Fivas van Reitz en Pietman Lourens van Swellendam, geklop.

De Waal boer saam met sy seun, Philip, by Moorreesburg en Vredenburg met koring, lupien, korog, hawer en medics en het ook 'n Simmentaler- en Hereford-stoetery.

Hy het op die toekenningsgeleentheid op Nampopark gesê Suid-Afrika het heelwat goeie boere en hy het goeie moed vir die toekoms. Tot 'n paar jaar gelede het hy nog swak moed vir die boer se beeld gehad, maar hy het nuwe moed gekry. "Ná vanaand sal ek nooit weer kla oor die paar rand heffingsgeld wat ek aan Graan SA moet betaal nie."

Met verwysing na die toekenning van Ontwikkelende Graanprodusent van die Jaar wat aan mnr. Lasarus Mothusi oorhandig is, het De Waal gesê hy is bly nuwe boere betree die landbou. "Die land se kommersiële boere verwelkom hulle met ope arms," het hy gesê.

Mothusi boer by Weltevreden in Noordwes. Hy het 30 jaar ondervinding van veeboerdery en 11 jaar van saaiery. Hy huur landerye en boer ook op gemeenskapsgrond waar hy sonneblomme, mielies en droëbone op 165 ha plant. Mothusi het ook vee.

Hy sê hy het sonneblomme eers as "vuilgoed" beskou en sy eerste oes was kwalik genoeg om 'n "vuurhoutjieboksie mee vol te maak". Later het hy groot oeste begin kry.

Mnr. Antonie Delport, besturende direkteur van Syngenta, die hoofborg saam met die Land Bank, sê die uitdaging vir boere is om net genoeg mielies te plant om winsgewend te wees en niks meer nie. Biobrandstof kan groter stabiliteit aan die landbou gee. Hy is verbaas oor die baie geld wat vir navorsing en ontwikkeling van hierdie nuwe bedryf beskikbaar is. Die Regering toon groot belangstelling, terwyl buitelandse maatskappye geld wil belê.

Landbouweekblad, 27 Oktober 2006