Bestuur brandbane korrek

Die voorsitter van TLU SA Noord, mnr. Dries Joubert, vra dat lede oordeelkundig brandbaanbestuur moet toepas om onnodige erosie te voorkom.

Mnr. Chris Wagner, voorsitter van die Waterberg Brandvereniging, het lede se aandag gevra vir die vereistes van die wet maar ook op die praktiese toepassing van die vereistes. Hy sê al vereis die Wet op Voorkoming van Veldbrande ondubbelsinnig van elke grondeienaar om brandbane om sy eiendom te maak, is dit des te meer so dat diegene wat bevoorreg is om in die Waterberge te boer, baie erg is oor die natuurskoon en geen moeite mag ontsien om dit so te hou nie. Elke verantwoordelike grondeienaar is in wese ook 'n natuurliefhebber en weet dat brande geweldige skade aan die natuurlike veld aanrig. Die beskerming van hierdie natuurerfenis is ook dus 'n boer se trots.

"Danksy die wonderlike reën wat ons die gebied die afgelope maande geniet het, het die veld welig uitgegroei, maar ongelukkig is die brandgevaar in die droë maande wat voorlê, sodoende verhoog. Met soveel brandbare materiaal sal enige veldvuur hewiger as normaalweg wees en selfs groot bome doodbrand. Dit sal boonop in die openbare oog sleg reflekteer op enige agterlosige grondeienaar en daarom is tydige optrede nou nodig."

29 Februarie 2008