Bewoners weier n

Boer raadop oor hofbevel nie uitgevoer word

'n Boer van Belfast in Mpumalanga het verlede week weer sukses behaal met 'n uitsettingsbevel teen inwoners op sy plaas, maar die mense weier glo dat hulle geskuif word.

Ingevolge 'n hofbevel wat verlede Dinsdag uitgereik is, is gelas dat Kleintjie Mtsweni en Rose Mtsweni "onmiddellik" verhuis na Gedeelte 6 van die plaas Driekop. Die adjunk-balju van Belfast is gelas om te verseker dat die bevel uitgevoer word "deur beheer te neem van die respondente met al hul besittings op Gedeelte 9 van die plaas Driekop".

Mnr. Rhys Griffiths, eienaar van die plaas, sê egter ondanks die hofbevel weier die Mtsweni's steeds om te trek. Griffiths sê hy het die plaas verlede jaar gekoop en met die hulp van die Departement van Grondsake is ooreengekom dat die mense verskuif sal word na beter huisvesting. Hy beweer met die mense "in die middel van die plaas" maak dit produksie onekonomies.

Griffiths sê die mense woon reeds vyf jaar op die grond en dat deurentyd aan die bepalings van die Wet op Sekerheid van Verblyfreg (Esta) voldoen is. Volgens hom is die situasie op sy plaas erg gespanne met beweerde dreigemente van die bewoners dat geweld gebruik sal word sou hulle verskuif word.

Luidens 'n brief van Griffiths se regsverteenwoordigers is vroeër ooreengekom dat die inwoners op 1 Januarie vanjaar verskuif sou word, maar dat die Mtsweni's toe ook teenstrydig met 'n skikkingsooreenkoms opgetree het.

2 September 2005