Blessing terug by grondkommissie

Sy passie vir die suksesvolle afhandeling van grondhervorming het die voormalige grondeisekommisaris vir Gauteng en Noordwes weer na die Grondeisekommissie teruggelok.

Mnr. Blessing Mphela het in 2006 bedank om 'n pos as adjunk-direkteurgeneraal in die kantoor van die Wes-Kaapse premier te aanvaar. Mphela is nou aangestel as adjunk-hoofgrondeisekommissaris. Dit is die eerste keer in die bestaan van die kommissie dat 'n adjunk aangestel is.

Hy neem nou terselfdertyd waar as hoofgrondeisekommissaris nadat mnr. Tozi Gwanya, vorige hoof, 'n week gelede as direkteur-generaal van Grondsake aangestel is.

"Ek verkies praktiese werk waar ek die impak kan sien bo hoë, langdradige beleidsgesprekke," het hy gesê na aanleiding van sy besluit.

Die kommissie het oor die jare 'n redelike uittog van amptenare ondervind. Dit is deels toegeskryf aan die feit dat die kommissie se werk teen Maart vanjaar, met die afhandeling van die restitusieproses, tot 'n einde sou kom. Die afhandeling en derhalwe ontbinding van die kommissie is nie-amptelik uitgestel met die onlangse aanduiding dat die Tesourie tot die boekjaar 2010/'11 nog hiervoor begroot.

Landbouweekblad, 21 Maart 2008