Boer soek vrou: Erg gewild

Mense val oor hul voete om die man of vrou van hul drome deur Landbouweekblad en kykNET se realiteitsprogram Boer Soek 'n Vrou te ontmoet. Die uurglas loop egter vinnig leeg vir mense om hul liefdeswoorde neer te pen en 'n kans op geluk aan te gryp.

Die aap is uit die mou gelaat oor wie die hubare vrygeselle - agt manne en twee vroue - is wat op soek is na hul perfekte maat. Nou hang dit net van Jan en San Publiek af om te laat waai met die pen en papier.

Dis duidelik die metgeselle is baie gretig om geluk en ware liefde te vind, want binne twee dae nadat die boere bekend gestel is, het Landbouweekblad en kykNET se posbusse oorstroom. Nadat die eerste program Maandagaand gebeeldsend is, is Landbou.com en kykNET se webwerf oorval met besoekers.

"Ons het direk ná die program die hoogste aantal besoekers nog gehad. Dit was regtig spesiaal," sê mnr. Haddad Viljoen, hoof van bemarking by kykNET. Volgens hom het 'n "massiewe" 3 000 mense na die webwerf (www.kyknet.co.za) gaan kyk.

Jan Bezuidenhout, Landbouweekblad se webredakteur, sê die tydskrif se webwerf het Dinsdag 'n rekordgetal besoekers van bykans 2 200 mense gehad.