Boere het rede om te wonder

Boere kan die taak om met innoverende planne vorendag te kom om nuwe toetreders tot die landbou geleenthede te bied nie ignoreer nie, want die behoefte aan grond durf nie weggepraat of geïgnoreer word nie. Daarom is die ewige retoriek oor buitensporige grondpryse en te min beskikbare grond 'n jammerte.

Mnr. Christof Cloete, voorsitter van Agri Wes-Kaap, het in sy voorsittersrede op die unie se jaarlikse kongres op Goudini ook gesê gemiddeld vier persent van Suid-Afrika se landbougrond kom elke jaar op die mark en die risiko bestaan dat die grondkwessie vir politieke gewin uitgebuit kan word.

Cloete het gesê die Minister van Landbou en Grondsake, me. Thoko Didiza, se benadering wek kommer, want enersyds is 'n geordende proses aan die gang oor riglyne vir grondhervorming en bemagtiging, en andersyds vind bykans ongestruktureerde grondberade onder haar toesig plaas waar die kommersiële landbou bykans uitgerangeer word.

"Ons het dus rede om te wonder presies wat die minister se agenda is. Ons kan net hoop dat die Regering hom sal hou by hofuitsprake," het Cloete gesê.

Hy is bekommerd oor naburige lande waar ernstige politieke onstabiliteit en wanorde heers, want Suid-Afrika bly deel van die kontinent. Ook die onstabiele partypolitieke klimaat van die Wes-Kaap is nadelig, want dit belemmer dienslewering op provinsiale en plaaslike vlak.

Eiendomsbelasting bly 'n haakplek en die Regering se ongevoeligheid jeens landbourampe bly onverstaanbaar ondanks baie vertoë daaroor. Rampe kan nie voorspel word nie en hy hoop die Wes-Kaapse premier en minister van landbou neem met erns kennis daarvan, het hy gesê.

Cloete meen pres. Mbeki, die Kabinet en provinsiale premiers gaan in die volgende jare 'n bepalende rol speel wat noodsaaklik is vir politieke stabiliteit, en elke boer moet daarmee rekening hou in sy langtermynbeplanning.

Ander sake wat rede tot kommer bied, is die onstabiele brandstofpryse en die feit dat die Regering klaarblyklik niks doen om dit te stabiliseer nie.

Voedselpryse bly ook styg. Dit is nie verstaanbaar in die lig van die krimpende inkomste van boere nie. Die fout lê volgens hom by die winkelgroepe, want hul besonder goeie finansiële resultate spreek boekdele.

Cloete het gesê die tyd is verby vir onderlinge verskille en strydende organisasies. Die werklikhede vra realistiese oplossings vir die volgende dekade, en daarom moet boere saamstaan en die "gewaffel" vir die politici los.

5 Augustus 2005