Boere moedeloos oor voertuiglisensies

Die nuwe bedryfsprogram wat twee weke gelede deur die Departement van Vervoer in werking gestel is, eNatis, jaag ook boere die harnas in. Die nuwe stelsel, waarop alle aansoeke om rybewyse, leerlingbewyse, lisensiehernuwings en registrasie van voertuie gedoen word, is op 13 April in werking gestel en veronderstel om dienslewering te verbeter.

Dit was egter nie die ervaring van mnr. Owen Green van die plaas Clearwater, Barkly-Oos, nie. Toe hy verlede week sy voltooide vorms na die plaaslike lisensiekantoor op die dorp geneem het, moes hy hoor dat vier van die sewe voertuie wat hy wou herlisensieer, eers weer vir padwaardigheid getoets sal moet word. Dit is omdat sekere inligting, soos enjinnommers, ontbreek.

'n Ontstelde Green het aan Landbouweekblad gesê dat die amptenaar geweier het om nuwe lisensies vir sy trekker, 'n sleepwa, bakkie en vierwielmotorfiets uit te reik. Ál die voertuie was nog verlede jaar gelisensieer. "Die amptenaar was onbeskof en het my bloot meegedeel dat hy niks daaraan kan doen nie en die voertuie weer padwaardig verklaar sal moet word. Dit beteken dat ek ál die voertuie 60 kilometer na die dorp moet aanry. Dit is belaglik omdat hulle klaarblyklik vantevore met een van die voertuie nie die regte inligting in die rekenaar ingevoer het nie en ek nou ook vir die bykomende koste van die padwaardigheidtoetse verantwoordelik sal wees."

Green sê hy gebruik die betrokke voertuie net op sy plaas, maar moet wel 'n openbare pad tussen sy verskillende plase kruis. "As wetsgetroue burger wou ek die regte ding doen. Hulle laat my nou geen keuse as om glad nie die voertuie te herlisensieer nie. Wat my die meeste ontstel, is die arrogante manier waarop die amptenaar my behandel het. Hy wou glad nie na my voorstelle luister nie," het Green gesê.

Drie pogings om met die betrokke amptenaar in verbinding te tree, was onsuksesvol. Daar is bloot aan Landbouweekblad gesê dat hy op die rekenaar besig is en nie oproepe kan neem nie. Teen spertyd het hy nie gereageer op 'n versoek om terug te bel nie.

Landbouweekblad, 4 Mei 2007