Boere verklaar oorlog teen Lulu

Boere het oorlog verklaar teen die Minister van Landbou en Grondsake, me. Lulu Xingwana, oor die soveelste lae hou wat sy na hulle gemik het in haar Kersboodskap wat as advertensie oor die radio uitgesaai is.

Haar invalshoek met die boodskap kan tot gevolg hê dat boere voëlvry verklaar word, plaasaanvalle en -moorde kan toeneem en dat Suid-Afrikaanse produkte op internasionale markte geboikot word, sê landbouleiers.

Intussen is daar gesprekke tussen Agri SA en die TLU SA aan die gang om 'n verenigde front te vorm en 'n gesamentlike optrede te oorweeg om hierdie onhoudbare situasie op die spits te dryf.

Albei organisasies het reeds briewe aan pres. Thabo Mbeki gestuur waarin hulle beswaar maak teen die herhaaldelike belastering van boere deur die minister wat in die presidensiële werkgroep opdrag het om die landbou te bevorder. Die boere voel egter sy doen nou meer skade as goed.

Die herrie gaan oor haar Kerswense aan die boere van die land, met die angel in dat boere nie "soos gewoonlik dié tyd van die jaar mense van plase af moet sit nie".

Mnr. Lourie Bosman, voorsitter van Agri SA, sê hierdie veralgemening is totaal onaanvaarbaar, veral in die lig daarvan dat dit nie die eerste keer is dat sy boere só beswadder nie. Volgens hom is haar opmerkings dat boere hul werkers onmenslik behandel, aanrand en verkrag deur amptelike ondersoeke as ongegrond bewys. Daarom is sy by die Menseregtekommissie van haatspraak aangekla en is 'n klag by die president ingedien.

"Wat ook baie ontstellend is, is dat die buitelandse media daaroor verslag gedoen het. Internasionale kopers is al hoe meer daarop ingestel om te weet hoe die produkte wat hulle aanskaf, geproduseer word. As hulle vermoed skendings van menseregte vind in die produksieproses plaas, kan dit tot boikotte van Suid-Afrikaanse produkte lei," het Bosman gesê.

Volgens hom kan dinge nie só aangaan nie. Hy sê die boere voorsien feitlik alles om die lewensgehalte van die mense op die platteland te verbeter en al wat hulle kry, is stank vir dank.

Mnr. Paul van der Walt, voorsitter van die TLU SA, sê 'n klag is by die Uitsaaiklagtekommissie gelê oor die feit dat onwaarhede, wat wanindrukke skep, in die advertensie van die minister vervat is.

Hy sê samewerking gaan met Agri SA probeer verkry word om kragdadig teen die minister op te tree omdat sy boere in die algemeen belaster. Amptelike ondersoeke het gewys die aantygings is onwaar, maar die minister gaan voort om dit net weer te herhaal.

"Daar is soveel kundigheid in die landbou vasgevang, maar sy ignoreer dit eenvoudig. Sy volg haar eie kop, wat skynbaar al hoe meer ideologies eerder as ekonomies gedrewe is. Dit sal die landbou nêrens bring nie", sê Van der Walt.

Volgens hom is Xingwana besig om met "haatspraak" 'n al hoe groter wig tussen haar en haar departement en die boere in te dryf. Een van die opsies wat oorweeg word, is om in die toekoms nie meer met haar oor landbousake te praat nie, maar regstreeks met Mbeki.

Besware oor die advertensie is van wyd en syd ontvang. Daar is veral kommer oor die feit dat die wreedaardige plaasmoorde en -aanvalle nie veroordeel word nie.

Landbouweekblad, 12 Januarie 2007