Buurmanskap

Ons het gekies om hier in die vreemde so te kom lewe. Soos boere oor die wêreld, met so min as moontlik arbeiders. Arbeid is beskikbaar, maar die grond is te klein om ´n voltydse arbeider te regverdig. Sommige dae en tye is dit nodig om ´n arbeider of ´n paar te kry om te help met sekere take._. Probeer om die dinge so in te rig om met die minimum arbeid, die beesboerdery te bedryf.

Om goeie buurmanskap onder sulke omstandighede te bewaar en te voed, is noodsaaklik. Situasies duik op wanneer mens op jou buurman se hulp moet staatmaak. Nié ingewikkelde gevalle nie, alledaagse katastrofes wat mens nie man alleen kan oplos nie. Sommige situasies, ondenkbaar vir mense met ´n groot aantal arbeiders. Trekker, wat deur my onoplettenheid, in die gat sit, bel buurman, hy stuur gou trekker. Spaar my ´n paar uur se grawe, met die ou graaf. Die ou lelike bont koei, wat met haar horing die spuit se glasie versplinter. Buurman, kan ek gou joune leen om klaar te spuit. Klein dingetjies, maar nodig dat jy die vrymoedigheid het om hom te nader.

In sonskyn en voorspoed moet ons die onderlinge vertroue lewendig hou. Dit is  ´n goeie tyd om jou oor jou buurman te bekommer en minder oor die toestand van die wêreld en die idiotiese uitsprake van een of ander onnosel politikus. Die regte tyd om aan te bied om iets vir jou buurman te doen. Dié tyd om mekaar se goeie punte en talente te ontdek en te weet wat om van mekaar te verwag.   Dink dat daar min dinge so sleg kan wees as om gedwing te word om ´n buurman, met wie jy in onmin lewe, te vra vir ´n guns. Begrawe ou verroeste strydbyle, dit kan die verskil tussen lewe en dood beteken.  ´n Goeie buurman sal gou sien as daar iets ongewoon is.

Die dag kan gou daar wees,  wanneer jy op buurman moet staatmaak in noodsituasies en dan is die vrymoedigheid daar om hom te vra, eintlik sal die wedersydse hulp outomaties  wees.´n Belegging in jou buurman sal goeie dividende lewer, hy is die naaste aan jou, dan help familie en vriende ver, niks. ´n Bonus  as die buurman ´n vriend ook is.  Ons was nog altyd gelukkig om bure vir vriende te hê.

Hasta la proxima