Die groot skrik!!

As jy alleen bly op 'n plaas is daar altyd die stemmetjie wat jou op jou tone hou vir 'n moontlike plaasaanval. As daar net ietsie anders klink in die nag buiten die gewone plaasgeluide dan word mens redelik gou daarvan bewus.

My geiser besluit mos 2 uur die oggend dat die druk nou te hoog is en 'n klep of so iets skiet met 'n knal soos 'n kanon en hou sommer aan skiet soos 'n hele boel R1 gewere. Dit op die stoep net 2 kamers verderaan.  Daardie tyd van die oggend slaap ek en my klomp Duitse Herdershonde die slaap van die dooies. Hulle reg rondom my bed. Met die eerste knal skrik die hele spul hulle self kapot en blaf histeries en soek net iets om te byt. Die krag gaan af en ek rol van die bed af om skuiling te soek. Met die beland ek op die jongste van die klomp honde en hy dink dit is die sware satan vanself wat hom aanval. As 'n jong hond skrik gaan al sy openinge wyd oop. Dus gil hy dit uit en no 1 en 2 word vryelik versprei. Met die uiteindelike raakvat van my flits sien ek net rook en storm uit die kamer die stoep af. Die honde wat voor hol kry toe eerste stoom en kookwater op hulle en draai soos blits om en onderstebo is ek weer met die hele klomp bo-oor my. Intussen gil die jongste blafter ook nog uit volle bors. Dit was die gouste krane oopdraai en ander toedraai en skakelaars afsit.

Met die ligte weer aan en die jongste getroos pak die vreeslike vrees my beet en sit en rittel ek van die skrik. Nou ja daars niks wat 'n lekker sterk beker koffie nie kan regruk nie- wou eintlik 'n goeie skoot van iets sterker daarby gooi maar ek is geneig om aan die giggel te gaan. Ek moes toe gaan stort en in 'n ander kamer gaan slaap danksy jongste se vreeslike geskrik. Daar en dan besluit ek om meer paraat te wees. My flits op sy plek en my skietpiet sommer by my in die bed en die sleutels van die hekke elke aand op die selfde plek. Wat ek omtrent die honde gaan doen weet ek nog nie. Hulle is net so moeg elke aand nadat hulle heeldag agter my aangehol het. Ek dink 'n inbreker gaan hom doodval oor hulle voordat hy by my uitkom....