Die Masjien

Besluit die vrou van die huis, so ´n rukkie terug, sy is nou moeg vir die geknie. Sy trakteer haarself en koop ´n broodmasjien. Dit is nie ´n gereelde ding, dié geknie nie, maar tog. Tuisgebakte brood baie beter as gekoopte, veral die reuk van daardie bakkende brood. Hier is baie verskillende soorte brood te koop. Bhieler bakkery en Bock bakkery verkoop ´n hele verskeidenheid van Duitse brode. Later meer daaroor. Dan ook nog ´n paar plaaslike bakkerye, hulle brode en bolletjies, oral beskikbaar.

Britania is die maak, wonder wat is die verbintenis met Engeland, made in Brazil. ´n Wonderlike masjientjie, kan ´n lekker warm, welriekende broodjie in ´n japtrap optower. Saam met die masjien, ´n resepteboekie, resepte van meer as 100 verskillende brode, selfs poedings en deeg vir pizza en allerhande bolletjies. Ongelukkig alles net in Portugoose, gelukkig is vriend Sandro, die ronde Brazileiro, daar om te help waar ons vashak. Sal ´n rukkie duur om alles op die proef te stel, of sal dit gaan soos met soveel resepteboeke. Beproef ´n klompie resepte en dan steek ons daar vas en geen nuwes meer nie.

Net ´n paar van die resepte, hopeloos te veel om te noem en die heel lekkeres uit te soek. Lemoenbrood, of met koejawel, of yoghurt. Appel en kaneelbrood. Brood met verskeie pizza smake. Hawermout en heuning. Brood met piesang en sjokolade. Knie alleen kan hy ook, croissantdeeg, pizzadeeg, paasbolle, moet vetkoekdeeg probeer. Poedings, melkpoeding, met gelatien, verskeie smake, pynappel, arbei, lemoen. Dan kan mens dalk later self begin eksperimenteer. As dit dalk lyk of ek voorkeur gee vir die soetes, dit is maar net blote toeval.

Hand geknie

Vir sommige van ons vriende, is hierdie nie meer ´n nuwigheid nie, maar ons geniet dit. Wat is lekkerder as warm brood waarin die botter, net botter, nie daardie ander geel, nagemaakte smeer, so smelt nie? Met ´n glas koue melk.

Hasta la proxima