DIE PAD NA NOOITGEDACHT-BASAAR

Vir baie jare reeds hou die Nooitgedacht-wyk van die NG-gemeente Kareedouw 'n baie unieke basaar. Wat die basaar so besonders maak is dat dit op die plaas self gehou word. Om daar te kom moet jy eers drie bergpasse oorsteek! Die eerste pas is teen die Zuuranysberg uit vanaf Assegaaibosstasie by Kareedouw. Die grondpad lei jou deur die Suurveld na die tweede pas af en oor die Kougarivier. Al kronkelend vat die pad jou verder tot jy die bekende of dalk gevreesde Moordenaarskloof-pas aandurf. Die pad is glad nie gevaarlik nie, maar motoriste moet maar tog stadig en versigtig met die pas afdaal na onder. Langs 'n pragtige stroom water en die mooiste geelhoutbome vat die pad jou tussen groot rotsformasies deur, verby die Nooitgedacht Primêre skooltjie, tot op die plaas Nooitgedacht, van Quinton en Eunice Nortjé. Wanneer jy eers daar in die afgesonderde, rustige plaasomgewing uitklim, weet jy dis die regte plek om te wees vir 'n groot plaas-lekkerte! Die basaar skop altyd af met die nou al beroemde pap-en-lewer ontbyt. Pannekoek, sop, koffie, poeding, gebak, tonne vleis (Suurveld skaap!) en allerlei ander lekkertes, te veel om op te noem. Almal ontspan sommer daar op die plaaswerf en in die skuur. So al kouende, word die wêreld se politiek opgelos en vind jy sommer uit hoe dit met al die familie ook gaan. Die basaar open om 10:00. Hierdie jaar gaan daar ook 'n pretdraf/stap plaasvind wat deur die Nooitgedacht Primêre skool aangebied word. Almal wat kans sien om die 10 km vanaf Brandekraal tot by die basaar te stap of te draf, moet vanaf 07:00 inskryf. Die wegspring is om 08:00. Inskrywings kos R20 en dit word by die ingang van Brandekraal gedoen. Daar sal drie waterpunte op die roete wees. Daar is groot pryse op die spel! Te bang om die pas te ry? Die oplossing lê in die Pretdraf! Vir meer inligting, skakel Elmien Schlechter, by 0799350019 of 042-2880733. "Op 'n donker aand in Julie-maand, op die pad na Nooitgedacht