Die Vier by Vier Gier

Oral sien jy hulle deesdae. Baie met jong ma's, agter die stuur. Effe neus in die lug as hulle afkyk op ander bestuurders. Baie van hulle sien nie eers ´n grondpad nie, wat nog te sê van ´n modderpad. Wonder watter persentasie was al ooit in ´n situasie waar die trek van al 4 wiele nodig was. Die groot passie en statussimbool van vandag, ´n 4x4.

Met die oorvloed reën, somtyds hier, kan daar ´n saak uitgemaak word vir die gebruik van ´n 4x4, maar selfs daaroor het ek my bedenkinge. ´n Voertuig met heelwat hoër brandstof verbruik, ´n ratkas wat onnodig vir die grootse tyd saamgesleep word. ´n Lomp voertuig wat nou maar net nie so gemaklik is en dieselfde padhouvermoë het as ´n gewone gesinsmotor nie. Met die regte agterbande en ´n “limited slip diff”, wat is die regte afrikaans daarvoor, kom die gewone plaasbakkie baie ver. ´n Verskoning hoekom hulle gekoop word, is dat hulle veiliger is omdat hulle hoër as die normale gesinsmotor is.

Dalk was die ou reg wat ´n 4x4 se definisie gegee het as ´n voertuig wat jou net op ´n meer ontoeganklike plek laat vasval.

Hasta la proxima

Ns. Ons pad lyk nie altyd so nie, maar na 4 dae se sagte reën, is dit maar glyerig. Nie een keer die 4x4 gebruik nie, goeie agterbande doen die ding.