Die Vlieënde Perd

Pegasus was daardie gevleulde perd in die Griekse mitologie. Die Spaans daarvoor is Pegaso. As kind onthou ek ook die lampolie en kragparrafien blikke met die Pegasus gevleulde perd op. Dink daar is min wat enigsins ´n idee het van daardie dinge. As jy dit onthou, sal dit beteken dat jy ook stokoud is. Ek het gister in ons dorpie ´n gevleulde perd raakgeloop, maar ek dink nie dat hy een meter sal kan vlieg nie.

´n Pegaso 3055. Vir my ´n vreemde voertuig. Militère kleur, maar in ´n baie goeie toestand. ENASA was die oorspronklike Spaanse maatskappy , gestig in 1946, wat hierdie vragmotors en ´n paar spoggerige motors vervaardig het. In 1980 het die Egiptiese regering hulle gevra om militêre voertuie vir hulle te vervaardig en hierdie was een van daardie modelle. Baie sterk en stewig gebou.

Iveco het hulle in 1990 oorgeneem en in 1994 het die naam verdwyn. Nog ´n kleintjie wat opgeslurp is deur ´n grootte. Steeds wil die foto's nie gaan waar ek hulle wil hê nie en die foto van die auto is van Wikipedia gegaps

Hasta la proxima.