In Die Vreemde

Ons besoek nog gereeld ons familie en vriende, in wat ons seker maar altyd, “tuis”, sal noem. Ontmoet dan ook minder bekendes en wildvreemdes. Baie is nuuskierig en oningelig van waar ons ons bevind en die omstandighede van ons lewe. Baie het die vrymoedigheid, in die oë van ander sien jy die huiwering, dink dalk dat hulle ons in die verleentheid sal stel, om te vra na ons “pioniers lewe”, hier in die vreemde.

Gelukkig is een van die eerste dinge wat ons geleer het; die opinie van ander, is nie vir ons ´n bekommernis nie. Meewarige mense wat verkondig dat ons lewensstandaard gedaal het. Hoe kan mense so iets kwytraak, as hulle ons nie voorheen geken het nie en eintlik niks van ons weet nie? Verwaand of dalk voorbarig? Iemand wat vra of ons darem kaas op ons brood kan eet? Dalk wou dié een, net weet of daar kaas en brood beskikbaar is, in die oerwoud?

Dat ons wel ´n eenvoudiger lewe ly, is so. Ons het besluit, wat vir ons van waarde is en daarby gehou. ´n Eenvoudige lewe gaan nie net oor besittings nie, maar ook oor beskouings en vooroordele wat opsy geskuif moet word. Van skuld wou ons so ver as moontlik wegbly. Skuld maak dinge baie ingewikkeld. In al die jare hier, nooit ´n tjekboek besit nie. Wel ´n bankrekening. ABSA, Nedbank, Standard of watter bank ook al, let wel, nie by een van julle nie. Al wil julle só graag, kort-kort, weet of my besonderhede korrek is. Los dít nou maar asseblief. Twee maande gelede eers ´n kredietkaart gekry, slegs vir die doel om Skype te aktiveer sodat Hettie haar bejaarde moeder gereeld kan bel.

Nog iets wat ons geleer het, troetel jou bure en die gemeenskap. Daaroor het ek al iets kwyt geraak. Moenie dat jy meer weet van die bekende loskopsanger of ander openbare figure, as van jou bure nie.

O, ja. Ons eet baie kaas, as die kaas op is, koop ons ´n blok van 3 kilogram.

Hasta la proxima