Dorper Sukses

Die bekende rasse verkoop sonder enige opwinding. Texels, Santa Inéz , Hampshire Downs en ´n Corriedale. Normale pryse, niks buitegewoon nie. Met die verskyning van die eerste Dorper is daar ´n paar oomblikke se stilte, ´n verandering van atmosfeer en dan die elektisiteit in die lug. Verwagting. Die afslaer se verering van dié nuwe ras in die land. Opwinding! Spanning te lees op die gesigte van die Brits familie. Die eerste veilings op die kleiner skoue was ´n proeflopie. Hierdie is die grote.

Raimundo Vargas Finestra, die afslaer, se aand is gemaak. Kopers wat nie huiwer om te bie nie. Verligting en glimlagte op die gesigte van die verkopers van die Dorpers. Die harde werk was die moeite werd.

Expo, Asunción, 2010. Die eerste amptelike deelname en veiling van Dorpers en ´n groot sukses vir die verkopers en bewys van die wye belangstelling en die versekerde toekoms van dié ras.

26 Santa Inéz skape is aangebied. Gemiddelde prys 1460 US$

29 Hampshire Down 1200 US$

16 Texel 1860 US$

9 Dorper 4380 US$

Duidelik dat daar ´n groot aanvraag na die Dorpers was. Vir die Brits familie van Caaguazu was dit ´n goeie skou en veiling. Eerste en tweede plek, ongewisselde ooie, eerste en tweede plek, ongewisselde ram en ook die groot kampioen ram. Baie goeie pryse ook gekry vir die diere wat hulle op die veiling gehad het. Die bekende Maris Llorens se Viradolce, was een van die groot kopers van die aand.

Die swartkoppe gaan hier nog volop word.

Hasta la proxima