Droogte in Argentinie 2009: Koring tekort

Beste Vriende, Ek hoop dat dit met almal goed gaan in die eerste maand van die nuwe jaar. Soos met my vorige skrywe wil ek vandag weer praat oor die droogte hier by ons en die gevolge daarvan. Die huidige situasie en komende voorspellings wys dat Argentinië en groot dele van Suid-Amerika tans onder die ergste droogte ly in 100 jaar. Vandag is die eerste skatting ontvang vir die koring oes van 2009/10 ontvang en die syfers het sommige eksperte laat voorspel dat die oes van sy huidige grootte van 8.5 miljoen ton vir 2008/09 na minder as 5 miljoen ton kan afkom. Daar is natuurlik mense wat glo dat Argentinië darem die 6 miljoen ton sal kan lewer wat benodig word om binnelandse aanvraag te vul maar die feit van die saak is dat die huidige uitvoerbare oorskot van 2.4miljoen ton, wat reeds baie klein is, volgende jaar nog verder gaan verminder. Argentinië se grootste koper van koring, Brazil, (wat normaalweg tot 4 miljoen ton van hierdie graan per jaar koop) het reeds aangekondig dat hulle 'n ooreenkoms met die Russiese Federasie onderteken het om van daar af te kan invoer. Die verskillende landbou sektore hier in Argentinië gebruik natuurlik die huidige stand van sake om die regering te blameer vir hulle swak en kortstondige landbou beleid. Die enigste regte vraag is natuurlik wat van die boere gaan word tot tyd en wyl die regering en die klimaat besluit het wat in 2009 gaan gebeur. Hou asseblief aan bid vir die boeregemeenskap hier wat op die oomblik regtig swaarkry en weens politieke twiste nie regtig die hulp verkry wat hulle benodig nie. Groete Die Argentyn