Goud

Mense waag hul lewens 

Dieper en gevaarliker as wat die foto aandui

Praat en dink ons aan goudmyne, dan sien ons reuse skagte en kabels en hysbakke wat op en af beweeg, maar daar is ander maniere van delf ook. Van die vroegste tye het die woord goud, mense snaakse dinge laat doen. Die idee van ´n fortuin het mense oor die aarde ´n koors laat ontwikkel wat net geblus kon word deur betrokke te raak en te help om daardie mineraal te ontgin.

Vyftig kilometer oos van ons, in die omgewing van die eens rustige dorpie Paso Yobai, het daardie mineraal, die rustigheid van beesplase en sojalande, kom ontwrig en die hele omgewing verander in een van afwagting en opgewondenheid en die hoop vir groot fortuine. Geen tradisionele goudstormloop nie, geleidelik, met pikke en grawe het dit in ´n erosiesloot begin, op die rand van ´n stuk “virgen” bos, soos dit hier genoem word. Vertikale are van die mineraal

Die vertikale rif wat die gouderts dra

Masjienerie wat die riwwe ontbloot en skoonmaak

Die kamera laat dit glad nie so diep lyk nie

Grondverskuiwingsmasjiene, mense met grawe en pikke, mense wat sakkies met klipperige grond wegdra, voertuie wat hierdie grond wegry na meulens. Diep slote, gevaarlike werk, dit is hoe dit hier gedoen word. ´n Rooierige aar in die klip. Die klip langs die aar word met masjiene verwyder en dan met hande arbeid, met grawe en pikke, word daardie aar skoon gemaak en in sakke gesit. ´n Entjie daarvandaan gemaal en gewas en met kwik word die goud dan uitgehaal. Groot gevaar van besoedeling.

Hoe winsgewend hierdie delwery is, kan niemand sê nie. ´n Aanduiding dat daar geld moet wees, is seker die feit dat al meer groot masjiene gebruik word. Arbeid vir bykans 2000 mense.

Bo, sakkies met gouddraende erts en die meule en wassery

Woud met naderkruipende mynhoop

Die vraag is, tot waar gaan hierdie goud are loop? ´n Klompie jaar gelede het ´n Argentynse firma hier in omgewing eksplorasiewerk gedoen. Het persoonlik met een van die betrokkenes gesels, natuurlik wou hy nie uitbrei nie, maar het bevestig dat, behalwe goud wat toe al ontdek is, daar nog heelwat ander minerale en elemente beskikbaar is en wat wag om ontgin te word.

Rustigheid wat verdwyn het, maatskaplike probleme wat hand aan hand met sulke ontwikkeling loop, is die prys wat betaal word. As al die goud verwyder is, sal die litteken vir ewig daar bly.

Hasta la proxima.