Internet en die landbou (2)

Hoe vinnig draai die wiel nie soms nie! Pas ná die vorige skrywe oor die internet en die landbou, is ek saam met die gesin en skoonpa na sy plaas toe naby Riviersonderend in die Overberg.

Ons is Vrydagmiddag in ‘n haas uit die stad weg om voor donker op die dorp te wees om sekere sake daar af te handel, en toe deur plaas toe.

Saterdagaand, ná die Bokke se onoortuigende “toets” teen Italië, trek ek die skootrekenaar nader met die oog om e-pos deur te gaan en ook op die webwerf te werk.

Die Vodacom-modem, wat so heerlik van die huis in die stad werk, skakel aan maar die verbinding bly 2G. Dis net ‘n stap onder die heerlik-vinnige 3G in die stad, waarmee ek gereeld saans en naweke werk. Sonder moeite.

Maar, om die minste te sê, 2G dit help nie veel daar in die Overberg nie. Landbou.com neem agt minute om oop te maak. Toe maak ek maar eerder toe en skakel die rekenaar af. En dink weer aan diegene wat ongelukkig is om nie die 3G-verbinding te kan benut nie. Dis seker die meeste boere op die platteland.

Die breëband-verbinding is so naby, maar dit só ver!

 23 November 2009