Kaiings

Vandag was weer worsmaakdag, daaroor het ek genoeg geskryf, ´n rukkie gelede. Lekker dag om in die huis doenig te wees. Buite half onplesierig. Sny daardie minder goeie vet en seningrigheid van die vleis af, dinge wat in die slaghuiswors maar net so gemaal word, weet mos nie wat kom alles in daardie wors nie. Of eintlik weet ons wat kom daarin, ook alles wat nie goed is vir die oog om verkoop te word nie. Wat gebeur hier met daardie afval stukkies? Reguit pan toe, kaiings.

Die wat dit nie ken nie en neus optrek, weet nie wat hulle mis nie. Kaiings met pap, koningskos. Net so lekker met brood. Oortollige vet, word ook uitgebraai vir daardie lekkerny. Ek weet daar is mense wat gaan skreeu kolestrol, kolestrol en al die ander gevare. Vet is uitgebraai, die meeste in elk geval en net die smaak is oor. Heerlik, geniet dit.

Jy vra wat van die uitgebraaide vet? Dít word saam met die honde se pap gekook en hulle ly tot dusver nie aan kolestrol nie.

´n Tradisionele, seker nie ´n dis nie, kos, wat die gewone mens nie meer ken nie. Kaiings is lekker.

Hasta la proxima