Kerkhofdag

Die eerste November is kerkhofdag, sommige praat van die dag van die dode. Aangesien dit my eerste 1e November was wat ek ´n werklike betrokkenheid by die dag gehad het, het ek ook my deel gaan bydra.

Oral is mense besig om die grafte skoon te maak, nuwe blomme en plante te plant, te snoei en te werkskaf. Klippe en stene reg te skuif Sommige, vir wie die seer nie meer so erg is nie, is aan die gesels, kuier en deel staaltjies. Sien mekaar een maal per jaar en dit is op hierdie eerste dag van November. Party kom ver om te sorg dat die grafte van hul voorouers en geliefdes in ´n goeie toestand bly. Doen dieselfde by grafte wat verwaarloos is, waar daar dalk niemand meer is om die taak te doen nie.

Hier en daar is ander, met die nuwe seer wat nog vlak lê, stil besig om hul ding te doen. Grafte met net die hopie grond nog, geen steen of kruis met die besonderhede nie. Die satynstrikke en die kunsblomme, gemeng met nuwe blomme, op die graf. Kort-kort nog ´n sakdoek of sneesdoekie wat te voorskyn kom. Van die ander wat dit merk, naderstaan en ´n bemoedigende drukkie gee.

Volgende Friedhofdag, sal die seer minder wees.

Hasta la proxima