Kettingsaag

Daardie aanhoudende, knaende geluid, word net oortref deur die getjank van ´n klein hondjie wat pas gespeen is, of die geweeklaag van ´n baba op ´n nagvlug bokant een of ander oseaan. Vroom, vroom, vroom, vroom. Of dit ´n Stihl of Husqvarna is, maak nie saak nie. Ewe irriterend.

Ongelukkig kan mens nie anders as om respek te hê vir hierdie klein masjientjies met hulle reuse verwoestings moontlikhede nie. Afhangende van die modelle, van ongeveeer 30 cc tot 50cc, kan die bedrewe operateur, die grootste bosreus, in ´n ommesientjie die gees laat gee. Hulle spoeg eenvoudig ´n stroom saagsels uit, wat die ou boom met ´n sug laat neerstort. Die reuk van 2-slagolie en die hout in die lug. Die enigste manier hoe die uitroeiing van die veelbesproke woude gekeer kan word, is wanneer hierdie masjiene verbied word, maar dit is seker onmoontlik. Byle en treksae is nog altyd daar.

Alles is darem ook nie net negatief nie. Die ou boom, wat aan die einde van sy lewe is, kan nog goed aangewend word. Na storms en vloede, is die gebruik van die kettingsaag, baie handig om die oorblyfsels van bome, makliker te verwyder.

Hasta la proxima.