Koningskos

Herfs en lente is dit sampioentyd, mits die weer natuurlik saamspeel. Humiditeit so
ongeveer 80% en die gemiddelde temperatuur tussen 20-25ºC, is gawe weer vir die
groei van sampioene. Sampioene word deesdae geklassifiseer as een van die
Supervoedselsoorte. Dit is hoog in beta-glukeen, ´n middel wat die mens se
immuniteitstelsel ondersteun, maar is nie een van dié Towerprodukte nie.

Wat die wetenskaplike naam van hierdie variëteit ( is dit die regte benaming??) is,
weet ek nie. Vir ´n leek lyk dit na Agaricus macrosporus, dalk is daar iemand wat
dit beter kan identifiseer. Wat ek wel weet, is dat dit nié Phallus impidicús is nie.
Dit is ook nie die eksotiese Shiitakes, wat R90 per kilo kos nie, maar ons s'n word
gratis op die plaas afgelewer, ongelukkig net die 2 tydperke per jaar.

Ons het die grond destyds by 2 Duitse dames gekoop en gelukkig het die tantes
presies geweet watter van die sampioene is eetbaar en kon ons mooi wys waarna
om te kyk. Ons verkies om dit net gekerf, nie te fyn nie, in ´n pan met bietjie botter
(asseblief níe margarine nie) en met of sonder uie te braai. O, hoe lekker! Net so,
met Hettie se tuisgebakte brood, is dit ´n ete op sy eie. Pasop, te veel, kan bietjie
ryk wees. Moet dit asseblief nie was nie, dan is dit ´n waterige massa.

´n Klompie jare gelede het oudominee Olaf Scheuer hier besoek afgelê in díe tyd
wat die sampioene volop was. Baie wantrouig het hy die petalje so gadegeslaan by
die eerste ete met sampioene op die tafel en seker maar gewag dat hy ons in ons
pynvolle laaste oomblikke kon bystaan. Toe ons, die uur wat hy ons gegee het,
oorleef het, het hy lustig meegedoen daarna het hy kort-kort ´n mandjie geneem
en gaan bymekaar maak.

As jy nie seker is wat eetbaar is nie, moenie probeer nie.

Hasta la proxima.