Korrekte 24 Februarie

Dankie aan almal wat al hierdie probeer lees het, maar agv die seine hier in die donga waar ons bly, was ek net halfpad getik aan die inskrywing toe gaan alle sein van die internet af en weg is die inskrywing. Hier volg egter min of meer wat ek vanoggend wou se....

Graag het ek raad nou nodig. Ons het ons skapies nou almal ge-ent en gedoseer. Hul het sopas vanoggend hul tweede rondte Teramycin gehad vir die "blok" van hartwater en hul doen goed. Een krisis net, ek het nou al 2 ooie gehad wat miskrame gekry het. Fetusse baie  klein nog. Ongeveer lyfies so 15-20cm. Kan dit wees van die skuif in omgewing, hantering of die spuit stof. Ons het gegee: Unidose, Multivax P, Teramycin en Cydectin.

Hul is regtig dierbaar en soos Leonie altyd se, hul het matriek. Weet al presies wat is hul roetine hierso en doen presies alles net so. Val ons aan as ons met die emmers loop waarin hul hul lek kry!! 

'n Ander vraag nav my gevleuelde vriende op die erf is: Hoe kry hoenders dikkop? My braaikuikens het dit nou ontwikkel en ek behandel hul maar is baie bekommerd dat dit na my le-hoenders toe oorskuif.

Die le-henne het ook hul eie storie. Het so 20dae terug Amberlink punt van le henne aangeskaf. Ek het 'n groot kamp waarin my henne rondloop en sodoende voorsien ek Vrylopende eiers aan gastehuise in die dorp. Toe die Amberlinks hier aankom is hul bekke gesny, iets wat ek nie met my hoenders doen nie aangesien alles so natuurlik moontlik hier bly. Die hennetjies het nie 'n idee gehad van wat die natuur is nie. Het aanvanklik die eerste 2 dae of stil gestaan of soos 'n trapsuutjie geloop want die gevoel van grond onder hul voete ken hul nie. hul kon ook nie die spinasie van die stamme af skuur nie. Kon letterlik niks doen wat die ander henne doen nie. Nou vandag doen hul alles. Hul skrop in die grond rond, vat stofbaddens, hardloop met goggas in hul bekke rond en is te dierbaar.

Het nou ook 2 van die ou henne tussen my nuwe jong Hi-Line kuikentjies gesit. Die leer hul nou ook hoe om hoenders te wees wat in die natuur leef. Eer-gister het ek ons een lammetjie tussen hul gaan bere want haar voetjie is seer. So windgat is die kuikentjies al, hul ry so 3 op 'n slag op haar rug rond in die hok!!! 

Op die erf nog ernstig besig met draadspan en kampe maak. Niks nog reg hier nie en ons werk dat ons buig. Maar ons is seker van die gelukkigste mense op aarde!!! Doodmoeg in die aande, maar 'n siel wat oorloop van geluk!

Geseende groete