Leunstoel Veiling

´n Veiling is ´n senutergende besigheid. Datums van veilings word lank vooruit bepaal. Wat die rol van die weer gaan wees, weet niemand nie. In hierdie hoë reënval gebied, kan reën enige tyd chaos veroorsak met sulke reëlings. Nat, modderige paaie wat maak dat veevervoerwaens nie kan kom waar hulle moet nie. Stresvol en minder lekker.

´n Stelsel wat vinnig besig is om gewild te word, is dié van die veiling op die skerm. Skakel baie onsekerhede uit. Indien ´n boer vee, hier eintlik beeste, wil verkoop, laat weet hy die firma wat dit behartig. ´n Verteenwoordiger kom neem ´n video van die diere, met al die besonderhede, massa, ras, geslag, ouderdom en verlangde prys. Die diere word gemerk sodat daar later geen dispuut kan ontstaan nie.

Daarna is daar 3 opsies, hoe gebie kan word. In ´n lokaal met groot skerm, waar al die kopers vergader en bie soos die diere op die skerm verskyn. Indien die verkoper se verwagting bereik of oortref word, word hy in kennis gestel en word die reëlings vir die vervoer getref soos dit beide pas. Indien daar geen verkop is nie, bly alles net so. Die ander twee is op die internet of in samewerking met ´n Braziliaanse TV kanaal. Vee word ook daar vertoon en kopers kan in hul huise telefonies of deur internet bie.

´n Boot ingerig om beeste op die rivier te vervoer.

´n Baie rustiger manier van sake bedryf. Rustiger vir die vee, reguit van die plaas na die eindbestemming, sonder die vreemdheid en ontwrigting van die onbekende omgewing van die veilingskrale.

Hasta la proxima