Maifest

Sommige van ons heg ´n negatiewe waarde aan die eerste Mei. Dalk omdat ons nie daarmee groot geword het nie en dit ingestel is toe dinge aan die verander was. Werkersdag, wat ons assosieer met linkse vakbonde en stakings. Hier word werkersdag gewoonlik gevier met die “dueños” (base), wat die werkers daardie dag onthaal. Soos die tradisie is, ´n braai (asado).

In die Duitse kultuur is die eerste Mei egter ´n dag wat baie jare gevier word, omdat dit tradisioneel as die eerste dag van die somer gereken word. Die plaaslike Duitse skool hou dan ´n sportdag, by die plaaslike sportklub, teen die naburige kloosterskool, of die susterskool, waar daar ook heelwat Duitse kinders is. Hier bestaan georganiseerde sport op skoolvlak glad nie. Kinders moet by sportklubs inskakel indien hulle mededingende sport wil beoefen. Dié dag is eintlik die enigste dag wat die skool sport aktiwiteite organiseer. Sporte waaraan deelgeneem word is onder andere sokker, binneshuise sokker, vlugbal en handbal.

´n Ander belangrike deel van die program, is die tradisionele Maibaum (Meiboom), waarteen die kinders moet opklim en ´n persentjie afhaal.

Aandprogram bestaan uit die uitdeling van die pryse vir die wenners in die onderskeie sporte. Daarna ´n kultuur program, musiek, tradisionele danse en kort opvoerings. ´n Ete, weereens braaivleis en slaaie en daarna ´n dans.

Die eerste Mei is ´n belangrike dag op die agenda en ´n dag waarna almal uitsien.

Hasta la proxima