Om te boer of nie te boer nie

Goeie dag daar

Die is nou vir jou 'n vraag.  Soos ou Hamlet van ouds sou se... wel net vertaal in ons lieflike Afrikaans.

Wel ek dink nie ons sal die vraag ooit kan beantwoord nie, want soveel mense soveel antwoorde.  Maar ek gaan uit my oogpunt dit tog probeer beantwoord.  Sien ek was ook eers 'n stadsjapie met 'n groot verlange na die vlaktes.

So ja ek het eendag besluit genoeg is genoeg, die stadsverkeer is te erg, die lug te vuil en die voeltjies te stil.  Alles verkoop en my stukkie grond gekoop.  My beeste wei te heerlik in die veld en ek word elke oggend met voelgesang wakker.  Wat meer kan 'n mens vra?  Klink idillies ne.

Wel ja en nee, dit is heerlik om sonder die stadsverkeer wakker te word en te weet dat jy jou eie baas is.  Heerlik om die son op jou te voel skyn en die wind in jou hare te voel.  En as dit reen, die paddas te hoor sing en die beeste wat soos lawwe goed te sien bokspring.  Ag en as die nuwe aankomelinge hulle eerste wankelrige tree gee, dan wil hierdie hart sommer vermuwwe.  Ja dan is ek so dankbaar dat ek hierdie wonderwerk elke dag kan aanskou.

Die negatiewe is, dit kan nogal baie alleen op die plaas raak, dus as jy die hele dag mense om jou moet he, wel dan gaan jy nogal sukkel om aan te pas.  Dinge kan nogal stil raak rondom 'n mens, net die natuur as jou geselskap. Tans is dit redelik droog hier in ons gebied en ai dit is hartseer om te sien hoe die weiding in die son doodskroei en die plante smag na water.  Die positiewe hiervan is dat 'n mens besef hoe afhanklik jy van jou skepper is.

Maar die grootste hartseer en negatiewe van die plaaslewe is die misdaad wat plaasving, van diere wat gesteel word, tot die plaasmoorde.  En dit my liewe vriende is 'n blog vir heeltemal 'n ander dag.

My antwoord op die vraag is:  As dit jou droom is gaan daarvoor, maak nie saak hoe swaar dit mag gaan nie!  Ek geniet nog elke oomblik daarvan en sal nie maklik my lewe hier weer vir die stad verruil nie.

Lekker boer!