Onkruid

As die onkruid ander oorweldig, is hulle maar net lui. As die onkruid jouself oorgroei, is dit darem baie kras en is daar genoeg dinge om te blameer. Dit was dalk te warm, bokant 35ºC, te koud, onder 15ºC, plante groei nie so goed buite hierdie temperature nie. Of dalk ook te droog. Onkruid het mos daardie nare gewoonte om jou so stadig ´n rat voor die oë te draai en as jy jou oë uitvee, maak hulle saad en dan is dit verby. Genoeg reserwe saad om jou vir 20 jaar te verpes.

In hierdie hoë reënval wêreld, oostelike deel van die land, 1500 mm per jaar, bly die bestryding van onkruid ´n daaglikse realiteit om mee rekening te hou. Weidings kan maklik ingeneem word deur ongewenste plante, breëblaar plante. Enigste oplossing, bossiekapper en as hulle mooi uitloop en toestande is reg, verkieslik in die lente, bespuiting met onkruiddoder wat Picloram en 2,4-D bevat.

Droeër westelike dele, die Chaco, verg ´n ander benadering. Die indringers daar, is bome, veral van die Acacia spesies. Elke paar jaar moet die weidings meganies bewerk word om bosindringing te voorkom. Bewerkings bestaan uit ´n V-skaar ploeg wat onder die oppervlakte beweeg en die gras minimaal beskadig, maar die jong boompies se wortels afsny, met ´n redelike swaar roller agter die ploeg. Ongelukkig het my foto`s van dié implemente in die slag gebly, net ´n foto van ´n roller, dié van Pieter van Rooyen, Lolita, in die Chaco.

Vir goeie weiding, moet hierdie slang in die gras beheer word.

Hasta la proxima