Oral

Daar is seker baie min lande waar daar nié ´n Suid-Afrikaner of wat voorkom nie. Die meeste van hulle staan hul plek met onderskeiding vol. Elke moontlike beroep.

Die afgelope week was hier in ons omgewing ´n jongman, wat sy verantwoordelike werk met ´n glimlag en toewyding verrig. Die bestuurder/mede toerleier van een van daardie reusagtige geel busse wat op heelwat vastelande te sien is. Niels Marais, werksaam by Tucan Tours. Saam met die vriendelike Nicky Self, Britse burger, die toerleidster, maak hulle ´n gedugte span uit. Vanaf Lima, Peru, reis hulle na die meeste belangrike toeriste besienswaardighede van Suid-Amerika. Cuzco, Machu Picchu, Bariloche, die Andes, die Pantanal, Ushuaia, Patagonië, Rio, Buenos Aires is vir hulle alledaagse plekke en staaltjies en vertellings volop van merkwaardige toeriste en gebeure op toer.

Daar is vir 34 passasiers plek op hul bus, Peggy. Die toergroep wat hier aangedoen het, bestaan uit ´n mengsel van Engelse, Australiëse en Vlaams Belgiese burgers. Vriendelike toeriste, dalk omdat hierdie toere effe meer informeel is. Die groot verantwoordelikheid wat op Niels se skouers rus, word duidelik as hy vertel dat hy elke 4 maande tussen 40 000-50 000 kilometer aflê. Daagliks van 400 tot 900 kilometers, as enigste bestuurder. Hy is ook verantwoordelik vir die normale onderhoud op Peggy, gelukkig staan sy hande vir niks verkeerd nie. Behalwe Afrikaans en Engels, is hy ook Duits en Spaans magtig en kan hom goed handhaaf met Portugees.

Sommige van die passasiers.

Wys maar net, waarheen die winde van verandering,  baie Suid.Afrikaners ook al waai, daar maak hulle ´n verskil in hulle omgewing.

Mag die beste span vandag wen, terwyl die Cheethas nié daar is nie.

Hasta la proxima