Politici

Sommige ly aan intellektuele arrogansie. Die ander ly maar net aan arrogansie. Nie omdat hulle so intelligent is nie, maar net omdat hulle monde so glad is. Ek wou sê bekke, maar ma het my geleer daar word nie so van mense gepraat nie. Dit is nou politici! Van die mees ongewilde spesies in ons samelewing. Wanneer sal hulle leer dat om te praat en te praat is een van die mees nuttelose aksies van die mens.

Is ongelukkig so dat wanneer politici, dus regerings, iets goed het om oor te praat, wat maar selde is, dan word daardie perd holrug gery. Indien nie, het hulle ´n stilswyende agenda. Boere is deesdae nie veel van ´n faktor wanneer dit by stem kom nie. Dit het nog glad nie tot baie van hierdie spesie se verwronge denkwyse deurgedring hoe belangrik voedselsekerheid en die verdien van buitelandse valuta is nie.

Hierdie is na aanleiding van die uitsprake wat ons president, Fernando Lugo, die oud Rooms- Katolieke biskop, met tot nou net 4 buite-egtlike kinders, in sy Kers-en Nuwejaarsrede kwytgeraak het. Ongevraagd en duidelik dat hy heeltemal oningelig is. Hy het dit gehad teen die gebruik van landbou chemikalieë, of “agro toxicos” soos hy dit noem.

Soja is hier die grootste verdiener van buitelandse valuta. Sonder die gebruik van daarde middels sal die produksie in duie stort en is die land op sy knieë. Dit verg tog nie buitengewone intelligensie om te weet, dat wanneer jy jou luukses wil vermeerder, soos politici graag doen, jy eerder jou produktiewe basis moet vergroot nie.

Laat ons die politici maar net beoordeel op wat hulle doen en van hulle woorde vergeet.

Hasta la proxima.