Rudi en sy beeste

Oorspronklike bos

Kamp waar hooi gesny gaan word.  Gatton  panic.

Ons stap rustig tussen ´n trop koeie met kalwers, om die waterkrip, besig om herkouend onder die koeltebome, die Chaco hitte te ontsnap. Min troppe hier wat ´n vreemdeling so ongeerg in hul midde sal toelaat. Ek bewonder die kondisie van die diere en die mooi kalwers. ´n Brahman koei laat sak haar kop en snork in ons rigting. Rudi haal sy sakboek uit en skryf die nommer neer en verduidelik mooi vir haar dat daardie gedrag, sopas vir haar ´n plek bespreek het op ´n reis na die slagpale, eenrigting. Geen diere word geduld wat ´n gevaar vir iemand kan inhou nie.

Rudolf of Rudi Wölk is mede-eienaar van die pragtige beesplaas, 14 km noord van die dorpie Neuland, een van ´n paar wat hy bestuur en besit. Drakrag van 1 ha/GVE, maar Rudi verkies om konserwatief te wees en minder te laai. Op 240 ha boer hulle met 120 koeie, kalfpersentasie van digby 90%. Brahman koeie as basis, op hulle word Rooi Angus en Gelbvie bulle gebruik, en op die rooi verse weer Brahman bulle.

Kamp wat bewei word met bottelboom

Kalwers

Kalftyd is gedurende Junie en Julie, die swaartyd, sodat die koeie nie ´n oorvloed melk het nie. Sodra die kalwers 250 kg bereik, word hulle gespeen, omdat aankopers diskrimineer teen te swaar kalwers. Die plaas is opgedeel in 10 ha kampies, daarvan word 1 gespaar vir hooi. Afhangende van die jaar, wissel die opbrengs van 4,5 tot 5,5 ton droeë materiaal per hektaar. Die beproefde gras is Panicum maximum of meer bekend as Gatton panic.

As ons omdraai en wegstap, is daar weer ´n koei wat snork en dit is dieselfde tante, wat maar net bevestig dat sy op reis wil gaan.

´n Plesier om so te boer.

Hasta la proxima.