Rys

Hier word gereeld ´n geleentheid gesoek om te vier. Vanjaar was dit die eerste geleentheid om die rys oesfees te hou. Tien jaar gelede is ongeveer 10 000 ha rys verbou en die oppervlakte onder dié gewas, is konstant besig om te groei. Vanjaar is die 60 000 ha merk verbygesteek. Dít het gemaak dat die betrokkenes besluit het om die rys oesfees by die dorpie San Juan Bautista te hou.

Dit was die ideale geleentheid vir die mense om die winsgewendheid van hierdie gewas te beklemtoon. Op die oomblik word daar ook proewe gedoen om ander gewasse buite seisoen te vestig. Dit wil voorkom asof raaigras ´n baie goeie opsie gaan wees. In hierdie vroeër oorwegend beesgebied, kan die raaigras dan gebruik word om die beeste op af te rond. Vroeëre laagliggende dele, wat swak kwaliteit weiding gelewer het, is nou baie meer produktief. Selfs die hergroei van die rys, nadat dit geoes is, lewer goeie kwaliteit weiding.

Gedurende hierdie geleentheid is die nuwe Claas rysstroper vertoon. Seker een van die grootse landboumasjiene. Hy kan net so gebruik word om koring en soja te stroop en met verstellings wat ongeveer ´n dag duur, kan hy gebruik word vir mielies. Sy rubber rusperbande voor, maak hom beweeglik en het hy die 50 km na die Estancia Catalina, waar hy gedemonstreer is,  in 3 uur afgelê.

Rys wat nie plaaslik verbruik word nie, word alles na Brazil uitgevoer. 10 jaar gelede was die gemiddelde opbrengs per hektaar 3 ton, die gemiddelde van die afgelope oes was 8 ton.

Volgende keer nog iets oor nóg ´n fees.

Hasta la proxima

Foto's Tomas Riquelme Estigarribia