Skaap en Bokopleidingsdag

Bosveld Dorperklub vier sy 25ste bestaansjaar!!

Gedurende 1984 het 'n klompie eienaars van skape in die omgewing van Nylstroom en Warmbad daaraan begin dink om 'n Dorperskaapklub te stig.

Op 13 November 1984 kom die klomp skaapboere bymekaar en stig 'n Dorperklub. Die eerste naam waarop hulle besluit het is die Noord Transvaalse Dorperklub. Die eerste voorsitter was Johan Enslin  en die ondervoorsitter Klaas Slabbert. Die stigtingsbyeenkoms was in die spreekkamers van Dr Marius Theron, 'n veearts van Warmbad.

Op die stadium het nie een van die lede en die belangstellendes kennis gehad van die rasstandaarde van die Dorperskaap. Almal het egter saamgestem dat die skaapras waarmee hulle geboer het verbeter moet word. Die lede het kursusse gaan bywoon en het toe ook begin om goeie aanteel skape aan te koop. Dit was ook nie te lank nie toe teel die boere self baie goeie stoetdiere.

Die entoesiasme waarmee die klub begin is betaan vandag nog. Die klub staan nou bekend as die Bosveld Dorperklub. Dit is ook die klub met die meeste lede van al die klubs in die land al is dit 'n uiters moeilike area om in te boer. Strawwe hartwater asook ander siektes wat in die oorspronklike skaapwereld nie voorkom kom algemeen voor. Dus 'n skaap wat hier geteel word moet uiters gehard wees.

Die jaar bied die Bosveld Dorperklub 'n gesamentlike Boeredag en Opleidingsdag aan vir skape en bokke op Woensdag 11 November 2009 by die Pietersburgse veilingskrale.

Die dag gaan propvol inligting wees vir almal wat reeds skape en bokke het of beplan om daarmee te begin boer. Twee Dorper inspekteurs van die genootskap gaan deel he aan die opleiding asook kundiges op die gebied van aangeplante weidings en dierevoeding. Veearse sal oa nadoodse ondersoeke doen en kuddegesondheid behandel.

Daar word ook spesiaal voorsiening gemaak vir die arbeiders wat die skape en bokke hanteer asook opkomende boere. Lesings word sover moontlik in hulle eie taal aangebied. Praktiese demonstrasies word deurlopend uitgevoer soos bv hoewe knip en hoe om sterte af te sit, hoe om reg te dosseer en die regte hantering van die diere ens.

Daar gaan pragtige skape en bokke wees asook die Dorpers wat op die veiling te koop aangebied gaan word die Vrydag met 'n veiling.