Skurke

Waarom doen mense dit? Natuurlik maar net omdat hulle kriminele is, te lui is om te werk en dink dat hulle bietjie meer geld op die makliker manier kan verdien. Omdat hulle ook geen respek vir ander se besittings het nie, ook nie eers vir die rusplek van die dode nie.

Die afgelope tyd het die Duitse Friedhof (kerkhof ) deurgeloop onder vandale, nee nie vandale nie, kriminele, diewe. Veral sommige van die ou grafte is gestroop van die metaal, lood, wat die grafskrifte gevorm het.  So ook metaal naamplaatjies. Selfs ou meester Fritz Schindler, ja, baie naby familie van die Schindler van die veelbesproke lys, se graf het deurgeloop. Die bronsbeeld, seker gedink dat dit ´n koper beeld was, is verwyder en is ´n groot deel van die grafsteen verwoes. Wat sou die waarde van ´n kilogram of wat se brons en lood tog wees?

Gelukkig is die nuwe grafskrifte van ´n baie sagte metaal.  Die huidige diewe het besef dat dit nie veel werd is  nie, maar of die volgende klomp so intelligent sal wees, sal net die tyd leer.

Wonder of die werk van ´n nag, die gewetenlose skurke, groot bevredignig verskaf het. Finasieel kon hulle nie veel gebaat het nie. Selfs in die Friedhof, sal die drek van die beskawing, nie die ontslapenes in “Friede” laat nie.

Hasta la proxima.