Stewels en boots

My eerste herinnneringe van stewels is van die Australiëse Bluntstones, kort stewels. Meesal gedra deur merinostoettelers, veral hulle wat so effe Engels wou wees en wie kontak gehad het met Australië. Regte Cowboy boots, was skaars. Soms gedra deur telers wat bees van Texas ingevoer het en boere wat in die VSA getoer het. Spoggerig! Dalk het daar ´n stigma gekleef aan stewels, want die “ducktails” het hulle gedra. Later het die “Country and Western” ding die sake verander.

Hier is stewels volop. Die gewone, goedkoop stewels wat die meeste van die werkers dra. Dan daardie modelle wat die manne met die groot hoede en breë belde met die blink gespes gebruik. Gewild onder die “estancieros”, die boere met die groot plase en baie bees. Veral die meer uitspattiges, jy merk hulle op ´n afstand. Pragtige stewels. Te mooi om in die mis mee te loop, gelukkig is hier nie veel klippe wat hulle kan nerfaf maak nie. Hoort amper eintlik op die “sidebord”, waar hulle net af en toe afgestof moet word. Vertoonstukke.

Stewels sal maar altyd deel van die kleredrag, van die mense met meer vertoon as die normale, bly.

Hasta la proxima