stoffeljoubert

Ons mense Hy kan van niks 'n storie maak; 'n ou storie weer nuut maak; 'n liegstorie die waarheid maak en soms die waarheid so bietjie na lieg laat lyk. Maar hoe dit ookal sy, hy kán 'n storie vertel. Hy't die gawe om waar te neem, en dit is nie net vir waarneem nie, dit is fyn kyk en mooi luister - dophou - die lyftaal en optrede van ander mense is sy palet, waarvandaan hy die kleure vir sy stories kry. Hy kan op die ingewing van die oomblik, na aanleiding van mense se reaksie die humor, spanning, emosie, waarheid en byklanke van 'n storie so verander om sommer onmiddellik 'n ander prentjie te skilder. 'n Ou storie kry sommer baie gou 'n nuwe baadjie en soms ook 'n nuwe blaaitjie. Hy kan stemme, klanke en geluide perfek namaak en dit verleen nóg meer kleur en luisterrykheid aan sy vertelling. Hy't die gawe om dinge so te beskryf dat 'n mens, al was jy nie daar nie of weet jy soms nie waarvan hy praat nie, jy dit jou wel in jou geestesoog kan voorstel. Soos die dag toe hy as die fiksste in die weermag aangewys is, of van die dae dat sy oorlede pa nog Karrie gemaak het, of van sy skooldae en sy jongdae as kind op die plaas. 'n Storieverteller van formaat, maar ook 'n planmaker by uitstek. Daar is niks waarvoor hy nie alreeds 'n plan het, of een kan maak nie. Of die planne altyd werk is debatteerbaar. Een ding is seker, "statistieke" het bewys, moet hom nie los om alleen reëlings vir 'n jag-trip of ekskursie te tref nie. Alles loop nie altyd volgens plan nie, en moet daar soms op die nippertjie rondgespring word. Hy praat selde van "ek" - dit is meestal "ons". Wanneer gaan ons hierheen of daarheen, wanneer doen ons dit of dat en soms wanneer hy nou regtig homself wil verontskuldig in 'n saak dan is dit "mens". "Mens kan mos ook nie mooigoed miskyk nie" want mens is mos maar net mens! Mens kan soms lelik in die sop beland, (al is dit nie altyd sy skuld alleen nie) maar wie kan nou kwaad bly vir mens, vra ek jou? Ek was al vies, sommer lelik vies, maar dit bly nie lank nie. Dit is hierdie mens wat so eie is aan Kareedouw, wat maak dat mens na mens verlang as jy lank weg was van die huis af. En glo my hier is baie van hierdie mense, ons mense, elkeen met hul eie eienskappe, gawes en kwaliteite. Slappy gebore en getoë in Tsitsikamma / Kareedouw, is selde alleen - Basie, deesdae eenoogig, of met net een "bulb" soos Slappy sê, (gelukkig net tydelik as gevolg van infeksie in die oog) is altyd by hom en volg hom soos 'n skaduwee, maar Basie het al 'n slag of wat die pad byster geraak tussen die verskillende gate. En soos "mens", was Basie ook al diep in die moeilikheid, is selfs "geban" uit die plaaslike restaurant want hy't sy been gelig teen Uncle Tom (Eienaar van Norma Jean's Diner) se gordyne. Nou bly Basie in die "van" of agterop die "van" sit, as sy baas op 'n warm dag 'n lafenis geniet. Slappy van Zyl, 'n melkboer, is getroud met Bernadette, 'n nooi Smuts en hulle het twee kinders - Estiaan en Anemi.