Sybille

In die supermark, raak mens gou bewus van die vriendelike vrou, met die styl hare, se teenwoordigheid. As dit lyk asof jy iets soek, is sy gou by om te help. Elke gemeenskap het sy vroue wat ´n verskil maak, wat hulle ook onderskei van ander vrouens, deurdat hulle op redelike jong ouderdom deur ernstige trauma is. Sterk vrouens, vrouens wat nie gaan stil sit en hulle laat onderkry het deur hul persoonlike tragedies nie. Hier is ook ´n paar en het ek reeds oor sommige van hulle geskryf.

Een van die raakvatters is Sybille Kröll. Eienaar/bestuurder van die grootste supermark in ons omgewing. Plat op die aarde en vriendelik, dalk die grootste rede waarom haar supermark so gewild is en kopers van heelwat verder as die onmiddellike omgewing trek. Nog van niemand gehoor wat ontevrede was met die diens by Super Almacen 50 nie. Die naam het sy oorsprong gekry met die “nuwe”gebou wat in in 1950 deur haar ouers opgerig is om die winkel te vestig. Vandag huisves daardie gedeelte die apteek, Farmacia Karin. 16 jaar gelede, toe ons hier aangeland het, was die winkel nog soos dié in ons kinderdae. Helpers agter die toonbank en jy vra hulle om vir jou te gee wat jy nodig het. Vier jaar daarna is dit verander in ´n redelike beknopte “selfhelp” winkel en in November 2006 is die splinternuwe supermark in gebruik geneem.

Sybille, of Bille soos sy algemeen bekend is, ma van twee jong seuntjies, verloor haar man in 1990 in ´n busongeluk. Hy was die eienaar van die Ybyturuzú diens, wat die omgewing met Asunción verbind. In 1994 sluit sy haar aan by haar ma, wyle tante Detta Fichter, self ´n formidabele vrou en begin die ongekende groei van Almacen 50. Bille huiwer ook nie om betrokke te raak by ander vertakkinge van die gemeenskap nie. Sy dien al vir baie jare op die bestuur van die Duitse Sportklub en die Evangeliese kerk

´n Vrou vir wie mens jou hoed kan afhaal vir haar besonderse durf en deursettingsvermoë. Deesdae word sy bygestaan deur Ollie, haar jongste seun.

Hasta la proxima