Eendbraai

Ons, die oueres van ons, onthou die advertensie van rugby, braaivleis, sonskyn en Chevrolet. Skaap, bees, vark en hoender, seker die gunstelinge vir op die kole. In Toulouse het ons iets anders raakgeloop, canard of te wel eendvleis, vir die braai. Gedink dat alle pluimvee witvleis het, glad nie waar nie. Rooi en heeltemal ´n ander struktuur.

Foie gras, eendlewer, daardie ryk, lekkerny van die Franse, afkomstig van eende wat geforseer word om te sluk, het tot gevolg dat daar baie eendvleis beskikbaar is. Skoonseun Daan, baasbraaier, weet presies hoe om daardie eendborsies, wil amper sê eendborste, 3 van hulle, effe meer as ´n kilogram, voor te berei. Koop hulle, gemarineer, 13.50 Euro per kilogram. Dik speklaag aan die buitekant. Braai dit hoofsaaklik op daardie speklaag, in blokkies gesny, dat die hitte kan indring en die vet kan uitbraai. As dit gaar is, is die gebruik om die vet af te sny, daardie “witvleis” is te ryk en het nie so ´n lekker smaak as die “witvleis” van skaap of bees nie.

Heeltemal lekker, so vir af en toe, maar kom darem nie naby sappige skaap of bees nie. Weet ook nie of dit as rooivleis beskou word nie.

Hasta la proxima