Vegetariërs

Daar is min dinge wat speekselkliere so aan die werk sit en daardie onwillekeurige gerommel in die maag laat ontstaan, as die reuk van braaivleis op die kole en spek in ´n pan. Dalk die reuk van braai-uie ook, maar nie naasteby nie. Eersgenoemde twee, vleis. Verbode vir vegetariërs.

Wonder nou al lankal of daardie reuk dieselfde uitwerking op vegetariërs ook het? Kan amper nie glo dat dit nie hulle reuksintuie sal aantas en die lippe laat aflek nie.

Hier by ons, is dié familie, pa, ma en vier seuntjies. Veral die pa, uitgesproke oor die nadelige effekte van vleis, hoe oneties die gebruik daarvan is en natuurlik ´n paar ander rare idees ook. Ma en kinders moet maar inval by pa se besluite. Sit hulle nou die dag regoor my by ´n funksie. Hulle borde gelaai met slaaie, die reuk van braaivleis in die lug. Die mense hier, kan nié sonder braaivleis nie. Hou hulle onderlangs dop en ek merk hoe daardie ogies, verlangend dwaal na die eters om hulle se borde, gelaai met vleis. Voel skoon jammer vir hulle.

Wonder wat hulle sou doen as daardie streng blik nie daar was nie. Laat my dink aan kennisse wat hulle kinders sonder die nadelige effek van suiker en veral lekkergoed, probeer grootmaak het. Hoe daardie kinders hulle self te buite gegaan het, weg van die wakende oog van pa en ma. Selfs die suikerpot bygedam en teelepels vol daarvan, vinnig verober het.

Die pa van die vier seuntjies, het genoem dat hulle aanhou probeer het vir ´n dogtertjie. Het hulle vleis geeet, was daar moontlik een. Weet iemand of daar ´n verband bestaan tussen die afwesigheid van vleis in die dieet en die produksie van seuns?

´n Vleisprodusent kan seker maar wonder oor hierdie dinge.

Hasta la proxima