Villarrica

Ons naaste groot dorp is Villarrica. Die werklike naam is Villarrica del Espritu Santo. Gestig die 14e Mei 1570 deur ´n Spaanse militêr, kaptein Ruy Diaz de Melgarejo. Villarrica is die hoofstad van die provinsie of departement, soos dit hier genoem word, Guaíra. Het ongeveer 58 000 inwoners. Skole en universiteite is hier gevestig, ´n dorp vol jongmense.

Was vir my eintlik verstommend, dat byna 80 jaar, voordat Van Riebeek, voet aan wal in die Kaap gesit het, die Spanjaarde al hier in die middel Suid-Amerika was. Wonder nóg hoekom het hulle nie destyds langs die kus van Afrika gevaar, in plaas van die onbekende Atlantiese oseaan aan te durf nie.

Die 14 e Mei word elke jaar gevier deur ´n optog van alle skoliere en studente deur die hoofstraat. Opmerklik ook die afgelope tyd is dat heelwat van die ou geboue uit die koloniale tydperk gerestoureer word. Of ten minste die fasades aan die straat se kant en in baie mooi kleure geverf word.

´n Dorp, vir ons is dit nie stad nie, met ´n lang geskiedenis en ryk aan tradisie.

Hasta la proxima