Waarom Merino landskaap?

Die is ‘n algemene vraag en is die volgende belangrike eienskappe die rede waarom die gewildheid van die ras die afgelope tyd so toegeneem het.

Bouvorm; Die Merino landskaapskaap se besondere grootte was in die verlede ‘n groot besprekingspunt en het baie kritiek uitgelok. Volgens die bekende beeskenner, Dr. Roger Hunsley van die VSA was daar die afgelope klompie jare ‘n neiging om verkeerdelik te glo dat groot en rankerige diere nie doeltreffend is nie. Gevolglik het die meeste rasse kleiner en korter geword. Volgens hom beteken dit nie dat ‘n klein vet dier doeltreffender is nie, dit beteken eintlik net dat hulle klein en vet is. Hierdie tendens het ook oorgespoel na die meeste skaaprasse toe. Verder is lengte van lyf volgens hom die belangrikste eienskap om meer vleis te produseer. Daarna volg breedte en laastens diepte.

Meer klem is die afgelope paar jaar gelê op breedte en diepte maar is daar volgehou om vir lengte van lyf te selekteer en is dit steeds die grootste ras. Met sy besondere lengte van lyf en grootte is die Merino landskaap dus die ideale ras. Verder beskik die Merino Landskaap oor uitstekende stapvermoë om in die veld by kos en water uit te kom en uiteindelik doeltreffender te produseer.

 Voeromserverhouding; Verder het die Merino Landskaap hom reeds al in die voerkraal bewys met sy uitstekende voeromsetverhouding ’n Fase C groeitoets wat by Irene gehou is en deur die LNR gemonitor is het die Merino Landskaap die beste voeromsetverhouding van al die rasse gehad wat deelgeneem het. (01:04,8 teenoor 01:05,2)

 Basterkrag; Die waarde kan nooit onderskat word nie en kan kruislammers tot 30% swaarder wees op speenouderdom as suiwer lammers. Basterkrag bevoordeel nie net groei nie, maar ook melkproduksie en vrugbaarheid in die volgende geslag Die verbruiker wil vir vleis betaal en nie vir vet nie. Gevolglik het die Merino Landskaap kruis en suiwer lammers die laaste tyd baie gewild geword by kopers wat lammers voer en afrond omrede die lammers vining groei en produseer hulle meer vleis met minder vet as ander rasse.

Om tred te hou met die ekonomiese uitdagings is dit nodig om meer vleis per hektaar per skaap te produseer. Die enigste manier om dit te vermag is om die gewig van spiere te vermeerder en die produksie van vet te verminder. Daar word gereken dat 9 kg voer nodig is om 1 kg vet te produseer by beeste, terwyl net 4 kg voer nodig is om 1 kg maer vleis te produseer. Dieselfde riglyn sal ook by skape geld. Ten spyte van die ras se grootte kruis hy gemaklik met die meeste rasse.Lamprobleme kom selde voor, omdat die lam klein is met geboorte en ‘n smal koppie het.

 Wol; Die ras het suiwer witwol vry van kemp met ‘n vag van tussen 20 en 26 mikron.

 Temprament.Nog ‘n belangrike eienskap van die Merino Landskaap is sy uistekende temperament. Makker diere pas makliker aan in voerkrale en is hulle voeromset verhouding ook beter as senuagtige wilde diere.

Vir kuddeboere om Merino landskaap ramme te gebruik is die voordeel dus tweeledig naamlik:                                                                                                      - dat jy jou ooikudde verbeter (melkproduksie, vrugbaarheid en bouvorm ),             - swaarder speenlammers deur basterkrag.

Vir stoettelers lyk die toekoms dus rooskleurig en gaan die vraag bly groei soos op die afgelope Nasionale Veiling waar ‘n gemiddeld van R11935 betaal is vir ramme. 

Die aanvraag na ooie is ook baie hoog maar is pryse van so ‘n aard dat voornemende stoettelers steeds ‘n uitstekende waarde op hulle belegging kan kry deur nou met ‘n Merino Landskaap stoet te begin. Die Merino Landskaap is gevolglik na jare se volgehoue teelbeleid van 'n,groot skaap met besondere lengte, goeie breedte en diepte, uitstekend geposisioneer om die ras van die toekoms te word .