Wurst

Bier, Duitse musiek, skat en wors. Deel van die Duitse tradisie en kultuur. Ontbyt is nie ontbyt sonder wors nie, 3-4 verskillende soorte, kaas en alles geeet op daardie hout plankies. Plankies waaroor ons gewonder het, toe ons hulle in die huis kom kry het. Na ´n ontbyt by die bure, het ons besef dit is vir ontbyt eet, nie vir boontjies kerf nie.

Kochwurst, Rohwurst en Brühwurst, is die verskillende kategorieë waarin Duitse wors verdeel word. Wil nie eers naasteby ´n beskrywing van al die verskillende tipes in elke kategorie gee nie, daarvoor sal mens ´n hele handleiding moet skryf. Kruie en speserye word aangepas by wat beskikbaar is en volgens smaak van elke huishouding, so ook met die samestelling van bees en varkvleis.

Die tradisionele slagfees is ook nie meer daar nie. Vroeër het die mense bymekaar gekom, geslag, vleis verwerk en daarna dan lekker saam geeet. Nou is dit vriendelike Stefan Schmidt, van Vienna slagtery wat die ding doen. Fleischmeister, was vir 3 jaar in Duitsland om sy vakleerlingskap te doen en alles van vleis en wors te leer. Van Krakauer, Bierwurst, Jagdwurst, Feine Bratwurst, Lyoner, Knackwurst (daarby moet mens dalk ´n Carling knak), Fleisch- und Leberkäse und Schinkenwurst weet hy omtrent alles

´n Tydjie gelede, proe die bure ons wors, gemaak volgens die resep in Kook en Geniet, moet ek ´n paar dae later vir hulle daarvan maak. Dink dit is baie lekker, smaak mos heeltemal anders as dié worse hier bo genoem. Ek dink ook, baie beter.

Salig rus mev Ina de Villiers, onlangs ontslape.

Hasta la proxima