Boran-bul duurste in SA

Die bul, Koning (TLM 05-26), van mnr. Eloff Muller van die Tambaraine-Boranstoet van Mosselbaai, is op 'n produksieveiling van drie telers in die Circle C-veilingskompleks by Verkeerdevlei teen R900 000 van die hand gesit.
Foto: Johan Norval

'n Boran-bul het Suid-Afrika se veilingsrekord vir beeste herskryf toe hy vir R900 000 van die hand gesit is.

Die bul, Koning (TLM 05-26), van mnr. Eloff Muller van die Tambaraine-Boranstoet van Mosselbaai, is op 'n produksieveiling van drie telers in die Circle C-veilingskompleks by Verkeerdevlei teen R900 000 van die hand gesit. Hy is een van die seuns van die befaamde bul Buffel van die Circle C-Boranstoet.

Die kopers is 'n sindikaat van ses lede, hoofsaaklik van Mosselbaai. Mnr. Adriaan Rall, rasdirekteur van die Borantelersgenootskap en teler van Heilbron, is een van die kopers.

Die nuwe rekord oorskry die R800 000 vir die befaamde Bonsmarabul AG 98-338 van die Benchmark-stoetery van mnr. Hennie Bezuidenhoudt, wat twee jaar gelede in dieselfde kompleks saam met 6 000 saadstrooitjies opgeveil is. Op dié veiling is is 'n koei en kalf vir R520 000 verkoop.
Die hoogste prys vir 'n vroulike dier op die Boran-veiling was R210 000.

Die vorige Boran-rekordprys is op verlede jaar se nasionale veiling van die genootkap in Bloemfontein opgestel toe die bul Yster van mnr. Johan Naudé, saam met 'n voorraad saadstrooitjies, teen R480 000 van die hand gesit is. Die koper van dié bul was mnr. Chris Coetzee van Namibië.

Die gemiddelde prys vir die 34 bulle wat op die Circle C-veiling verkoop is, was R81 612,90 en vir die 50 vroulike diere R49 640. Die omset van die veiling wat deur SHM-afslaers van Potchefstroom behartig is, was R5 044 000.

Van die ander kopers van dié rekordbul is mnre. Nico Wasserman (Standerton), Hans Nel (Alma, Noordwes), Marius Meyer (Mosselbaai), Hennie Rall Mosselbaai) en Adriaan Rall (Heilbron).

8 Junie 2008