Britte, Brasiliane wil etanol in SA maak

Brasilië en Brittanje kyk ernstig na Suid-Afrika en Mosambiek om etanol vir brandstof te ontwikkel.

Luidens 'n berig van die internasionale nuusagentskap Reuters wil dié twee lande aanlegte vir die produksie van etanol uit suikerriet hier ontwikkel. Die fokus is op Suider-Afrika, maar Suid-Afrika en Mosambiek word spesifiek uitgesonder.

Mnr. Luiz Furlan, Brasiliaanse minister van handel en nywerheid, het op 'n mediakonferensie in die hoofstad Brasilia gesê 'n uitvoerbaarheidstudie van Brasilië en Brittanje het reeds verskeie lande, waaronder lande in Suider-Afrika, geïdentifiseer waar die produksie van etanol uit suikerriet kommersieel moontlik is.

Luidens die berig het Brasilaanse akkerboukundiges geen "tegniese struikelblokke" in Suid-Afrika vir etanol-produksie ondervind nie. 'n Taakgroep bestaande uit lede van Brittanje en Brasilië word nou glo saamgestel wat binne die volgende drie maande met 'n sakevoorstel vorendag moet kom.

Brasiliaanse kenners het drie weke gelede 'n werksessie in Johannesburg aangebied waar 'n afvaardiging aangebied het om sy kennis en kundigheid met die land te deel.

Mnr. Fanie Brink, besturende direkteur van Biofuels Industry Development, het by navraag die verwikkeling as gunstig beskryf en gesê net soos die res van die wêreld sy afhanklikheid van ru-olie vir brandstof verminder, moet Suider-Afrika en veral Suid-Afrika dit óók doen. Hy sê dit is welkome nuus vir suikerboere, maar die potensiaal bestaan ook om biobrandstof uit ander landbouprodukte, soos mielies, te verskaf.

15 September 2006