Bystandfonds vir Zim-landbou

Agri SA het 'n bystandfonds vir die landbou in Zimbabwe in die lewe geroep.

Die ekonomiese krisis in Zimbabwe neem onhanteerbare afmetings aan. Met 'n inflasiekoers van nagenoeg 5 000 persent, toenemende onderbrekings in en agteruitgang van noodsaaklike dienste, onverkrygbare produksie- en verbruikersgoedere, is daar 'n dringende behoefte aan menslike maar veral materiële steun in ons buurland. Agri SA het reeds in die verlede bystand gelewer deur 'n bystandfonds ten behoewe van die Commercial Farmers' Union van Zimbabwe (CFU) en sy lede te administreer. Daardie fonds is tans uitgeput.

'n Voorbeeld van die tipe bystand wat 'n verskil kan maak, is 'n kragopwekker wat onlangs aangekoop is om die CFU se hoofkantoor met sy telekommunikasie funksies en IT-sisteme operasioneel te hou. Langdurige, daaglikse kragonderbrekings het 'n alternatiewe, standhoudende kragopwekking noodsaaklik gemaak.

Agri SA se affiliasies is versoek om elk vir dié doel R3 000 of meer by te dra - 'n versoek waarop goed gereageer word. Hierdie is maar een van 'n verskeidenheid dringende behoeftes wat in ons buurland ondervind word terwyl hulle werk en wag op 'n politieke uitkoms as 'n voorwaarde vir ekonomiese herstel.

Die rol van burgerlike organisasies in Zimbabwe, soos die CFU, om nou en in die toekoms 'n bydrae tot nasionale dialoog en ontwikkeling te maak, kan nie onderskat word nie. Hulle is ook goed geplaas om te adviseer oor waar die grootste nood in hulle sektor bestaan en wat daaromtrent gedoen kan word.

Teen hierdie agtergrond doen Agri SA 'n beroep op landboubesighede, maar ook enige ander persoon of instansie wat hom/haar met hierdie saak wil vereenselwig, om 'n bydrae te maak tot die bystandfonds.

Die betalings kan per tjek of elektronies gedoen word by die volgende bankrekening:

ABSA Bank,

Rek. nr: 4050566323,

Takkode: 32645,

Rekeningnaam: Agri Infor Africa Edms Bpk.

Hierdie besonderhede is ook op Agri SA se webwerf beskikbaar: agrisa.co.za

20 Julie 2007