Didiza moet s

Boere wat geraak is deur die onlangse uitbreking van voëlgriep in die Oos-Kaap, het teen Donderdag verlede week nog in spanning gewag om te hoor hoeveel, en wanneer, hulle vergoed sal word vir die voëls wat weens dié siekte van kant gemaak moes word.

Mnr. Anton Kruger, bestuurder van die SA Volstruisbesigheidskamer op Oudtshoorn, sê alle voëls op die plase wat deur die kwarantynmaatreëls geraak word, was teen Dinsdag verlede week dood. Nagenoeg ses maande sal nou moet verloop voordat weer met volstruise op dié plase geboer kan word. "Geen infeksies het tot dusver buite die kwarantyngebied voorgekom nie. Die depper- en serumtoetse gaan voort en sou teen die einde van die week afgehandel wees."

Mnr. Johan Schoeman, hoofbestuurder van administrasie by die Klein Karoo-groep, sê die Klein Karoo-koöperasie se prys aan sy lede is op amper dieselfde as wat hulle betaal het voor die verbod op uitvoer ingestel is. Die prys vir voëls wat meer as 43 kg weeg, is R20/kg en vir dié wat 35 kg tot 42,9 kg weeg, R19/kg. Dit is net R2,50/kg minder as die uitvoerprys wat betaal was. Die prys vir voëls onder 35 kg is onveranderd op R14/kg.

Schoeman sê danksy die binnelandse verspreidingsnetwerk wat die afgelope vyf jaar deur die Klein Karoo-groep in stand gehou is, kan dié struktuur in hierdie krisistyd doeltreffend gebruik word. Die reklameveldtog om plaaslike verbruik aan te moedig, blyk suksesvol te wees. "Ons is in ons skik met die toename in die verbruik van volstruisvleis en sal waarskynlik 'n geruime tyd daarmee voortgaan," het Schoeman bygevoeg.

Intussen het 'n groothandelaar in Port Elizabeth gesê volstruisfilet verkoop teen R90/kg, gemengde filet teen R50/kg en volstruissteak teen R35/kg van die hand sit. Die pryse sluit nie BTW in nie.