Dierevoeding

In sekere dele van Amerika word armmanslusern (Sericea lespedeza) as ’n "noxious weed" beskou. Hou dit enige bedreiging vir boere se natuurlike weiding in? Sal dit die veld oorneem?

Ek wil graag weet watter tipe weimielie om te plant vir skaapvoer doeleindes. Ek is in Pretoria Oos omgewing, reenval so 800-1200mm per jaar. Geen besproeiing. Is besmesting nodig? Grond is baie hard, bietjie klipperig en klei-agtig.

Baie dankie vir 'n uitstekende diens wat julle hier lewer.

Michelle

Ek woon ongeveer 30 km vanaf Bronkhorstspruit, winters relatief koud, somers warm. Reёnval tussen 800-1200mm per jaar. Ek wil graag alternatiewe gras vestig omdat die plaas oorwegend suurveld is. Die plaas is geleё op 'n koppie en die bogrond is redelik klipperig. Groot gedeeltes van die plaas het ronde mierneste en dit wil voorkom of heelwat grassaad in die mierneste voorkom.
Is daar spesifieke gras of ander gewasse wat u kan aanbeveel?
Dit blyk dat grassaad nie maklik gevestig word deur die saad met beeslekke te meng en sodoende te versprei nie. Groete, Martin Kruger

Ek het huidiglik suiwer Dohnemerinolammers in my voerkraal. Ek speen my lammers op 'n baie vroeë ouderdom. Lammers ontvang dieselfde rantsoen met kruipvoer as wat hulle in die voerkraal ontvang. Met insit van lammers in die voerkraal het die lammers 18.4 kg geweeg en Ralgro ontvang. Die lammers het onmiddellik in die eerste week met 279 g/dag gegroei met 'n voeromset van 2.2:1. Die voeromset het in die weke wat gevolg het redelik verswak. Koue toestande het ‘n groot rol gespeel, maar temperatuur is nou gunstiger. Ek het die lammers nou al 7 weke gevoer en die voeromset oor die hele periode staan gemiddeld op 3.39:1. Die lammers weeg nou gemiddeld 34.6 kg. Ek wil weet tot op watter gewig ek die lammers moet neem om die maksimum wins uit hulle te genereer. Lammers ontvang afgeronde rantsoen sonder enige ruvoer apart behalwe 1ste week kry lammers 100 g lusernhooi saam met rantsoen. Hierdie syfers is 100 % akkuraat.

Ek wil graag weet as jy afvalkosse soos bv. appels, lemoene, druiwedoppe, asook ander kossoorte het en dit word deur 'n masjien verwerk tot 'n droё eindproduk, wat in die eindproduk moet wees sodat dit vir plaasdiere gevoer kan word? Dankie, Barend.

Na aanleiding van die melkkatastrofe wat op die oomblik in die land afspeel, het ons nou begin wonder of die gras maar net groener lyk aan die ander kant van die draad. Die vernaamste vraag is: Wat is die winsgewendste, melk vanaf weidings onder besproeiing (soos in die Tuinroete/Tsitsikamma) of volvoermelkery waar die voer op die plaas self geproduseer word (soos in die Overberg). Dis nou as in ag geneem word die droogtesituasie in die besproeiingsgebied. Wat is die prys van risiko, soos as die besproeiingswater heeltemaal opdroog? Wat is die geleentheidskoste vir die maak van kuilvoer/hooi op droëlande waar gars/koring/kanola verbou kan word? Is die risiko nie minder by 'n volvoerstelsel nie?
Let wel hier in die Suid-Kaap moet mielies na almal aangery word.
Dit is miskien bietjie wyd ,maar die hele situasie in die melkbedryf op die oomblik het ander denkwyses na vore laat kom.
Groete
Hanskalf

Ek het 'n 80 hektaar pan met gras (12 % proteïen) op. Ek wil 'n verskuifbare kamp maak en lammers daarin sit, sodat die ander skaap nie die byvoeding kan vreet nie. Watter byvoeding kan ek gee om die gras optimaal te benut? Ek het mielies indien dit benodig sou word. Sal dit dieselfde resultaat kan gee as ‘n voerkraal en sal ek kostes spaar deur dit so te doen? Groete. Ben Venter

Ek gebruik jare lank al Potch-lek by my beeste met baie goeie resultate. Ek het by my pa geleer dit word ook kwart-kwart lek genoem a.g.v. die samestelling. Die lek bestaan uit 1 kwart mieliemeel, 1 kwart sout, 1 kwart dikalsuimfosfaat en 1 kwart ureum. Alles moet baie goed fyn gemaak word en baie goed gemeng word.

Beeste moet ook eers gewoond gemaak word aan die lek deur die ureum te verminder en dit dan mettertyd meer te maak.

Ek wil nou baie graag die volgende weet.
1. Kan die lek ook effektief vir Dorperskape gebruik word?
2. Is dit nog steeds die mees ekonomiese lek?

Baie dankie. Paul Ackermann

Ons het 'n Saanenkudde van ongeveer 160 bokke. Het al met Spesfeedprogramme gewerk om rantsoene te balanseer. Waar kan ons inligting kry oor die voedingsbehoeftes van die verskillende diere in 'n kudde bv. lakterende ooie of lammers?
johankooij@yahoo.com

Hoe lank sal dit neem om speenkalwers van 180 kg na 280 kg te vat op sugargraze en weimielies? Watter byvoedings of lekke behoort ek te gebruik? Jaco