Distell huur omgewingskundige

Die genoteerde drankgroep Distell het 'n omgewingsbestuurder, mnr. Jacques Rossouw, aangestel om sy koolstofspoor te help verklein. Rossouw sal, onder meer, betrokke wees by die meting en bestuur van die kweekhuisgasse wat Distell vrystel.

Rossouw was voorheen betrokke by omgewingsregulering in Australië en was ook die bestuurder van die Suid-Afrikaanse wynbedryf se progressiewe en volhoubare Geïntegreerde Produksie van Wyn-program (IPW). Dit is in dié hoedanigheid waarmee hy met die samewerking van Distell die Internasionale Wynbedryf Rekeningsprotokol en Rekenaar vir Kweekhuisgasse-stelsel ontwikkel het.

"Met die metodologie vir die berekenning van die koolstofspoor tot ons beskikking, kan ons nou begin om vrystellings te meet en strategieë te ontwikkel om ons impak op die omgewing te verminder. Hoewel dit allereers vir wynboere bedoel is, kan die protokol aangepas word om Distell se impak op die omgewing ten opsigte van ander produkte, soos spiritualieë, siders en reg-om-te-drink-drankies, te meet," sê dr. Gert Loubser, direkteur van gehaltebestuur en navorsing.

Distell het reeds internasionale lof gekry vir sy herbenutting van koolstof wat tydens die gistingsproses vrygestel word. Die gas word gesuiwer en weer gebruik om vonkel in siders te plaas.

23 April 2009