Druiweboere moet omsigtig uitbrei

Tafeldruifprodusente wat die kultivar Crimson Seedless produseer, moet waak teen onverantwoordelike uitbreiding. Oorproduksie kan die prys laat tuimel — net soos in die verlede met ander goeie kultivars gebeur het.

''Die vraag en aanbod moet met mekaar tred hou om volgehoue goeie pryse te verseker,'' het prof. Daan Louw van Optimale Agri Besigheidstelsels (OABS) in Stellenbosch gesê.

Louw het op 'n inligtingsdag oor Crimson Seedless gesê dié kultivar beslaan reeds 33 % van die mark vir rooi pitlose tafeldruiwe en dit groei steeds. Crimson Seedless beslaan 7 % van die totale produksie van tafeldruiwe in die land.

Soos met die meeste sagtevrugte is Chili die grootste mededinger vir Suid-Afrika se Crimson Seedless op die Europese mark. Die sterk euro maak Chileense uitvoer na Europa baie aanloklik, maar die stygende olieprys kan uitvoer dalk temper omdat Chili heelwat verder van die Europese markte is as Suid-Afrika.

Dit lyk ook of die Chileense oes van Crimson Seedless al vroeër gereed is, wat dit gevaarlik vir uitvoer uit die Hexriviervallei na Europa maak, sê Louw. Sedert 2002 het die volume uitvoer van Chili na Brittanje met 55 % gestyg. Dié groter hoeveelhede druiwe op die Britse markte laat pryse daal — veral in die tyd wanneer die Chileense uitvoer hul hoogtepunt bereik.

Louw meen die tyd is ryp vir lande in die Suidelike Halfrond om meer saam te werk en gesamentlik na lande in die Noordelike Halfrond te kyk wat uitvoer betref. Die Verre Ooste is ook 'n groeiende mark wat benut kan word.

Hy waarsku dat boere nie Crimson Seedless op marginale grond moet vestig nie. Dit gaan gehalte benadeel, wat tot nadeel van die hele bedryf is — ook vir diegene wat die kultivar op goeie grond plant.

5 Augustus 2005