Duitse staking oor swak melkprys?

Melkboere in Duitsland is oorgehaal om hul tenke se krane oop te draai en die melk te laat vloei as daar nie daadwerklik ingegryp word om die melkprys in dié land te verbeter nie.

Dr. Thomas Grupp, algemene bestuurder van die Beierse Fleckvieh genetiese program, het op die landbouvereniging Dipka, by Swellendam, se vergadering gesê hoewel daar 'n oplewing in die Europese landbou is — veral vir graan, mielies en varke — loop die melkbedryf sy rieme styf teen burokrasie, plaasbeheer, nuwe wette oor die welsyn van diere en omgewingsregulasies. Die melkboere se koste het weens arbeid, masjinerie, paghuur en voer ook die hoogte in geskiet.

Die melkprys in Duitsland is die afgelope twee jaar minder as wat die prys tien jaar gelede was.

"Die Europese gemeenskap wil melk vir minder as 20c (euro) per liter verkoop. Hulle wil 'n lae prys vir melk hê," het hy gesê.

Volgens Grupp is supermarkte ook sondaars. Die ongeorganiseerde boere kan nie met hulle onderhandel nie en moet dus die lae prys aanvaar.

Een van sy voorstelle is om boere onder 'n oorhoofse liggaam te laat saamwerk. Só 'n organisasie is onlangs gestig.

Hulle beoog om só die melkprys na 'n doelprys van 40c (euro) per liter te laat styg.

"Die allerlaaste uitweg is om melkproduksie te stop en 'n melkstaking te hê," het hy gesê.

"Ons is bereid om die krane in Oktober oop te draai as die verandering nie aanvaar word nie. Al die lede het 'n demokratiese verkiesing gehou en ons is dit eens — as hulle nie die nuwe prys aanvaar nie, draai ons die krane oop."

Elke nedersetting het 'n ook 'n verteenwoordiger wat dan na plase mag gaan en as die boere nie self die melk laat wegvloei het nie, mag die verteenwoordiger dit doen.

"Neem die stuurwiel van u onderneming terug in u eie hande," het Grupp aan die boere gesê.

Landbouweekblad, 16 Maart 2007